ಸೆಪ್ಟೆಂಬರ್ 22 ಶ್ರೀ ಅನಂತಕುಮಾರ್ ಅವರ 68ನೇ ಜನ್ಮದಿನ. ಈ ಸಂದರ್ಭದಲ್ಲಿ ಅದಮ್ಯ ಚೇತನ ಮತ್ತು ಅನಂತಕುಮಾರ್ ಪ್ರತಿಷ್ಠಾನದ ವತಿಯಿಂದ ಅವರ ಜೀವನ, ನಾಯಕತ್ವ, ಸಾಧನೆ ಮತ್ತು ಅವರು ಬಿಟ್ಟುಹೋದ ಮೌಲ್ಯಯುತ ಪರಂಪರೆಯನ್ನು ಸ್ಮರಿಸಿ ಸಂಭ್ರಮಿಸಲು ನಾವೆಲ್ಲರೂ ಒಂದಾಗಿ ಸೇರುತ್ತಿದ್ದೇವೆ.

ಅನಂತಕುಮಾರ್ ಅವರನ್ನು ಸಹೋದ್ಯೋಗಿಯಾಗಿ, ಸ್ನೇಹಿತರಾಗಿ, ಸಾರ್ವಜನಿಕ ಜೀವನದ ಸಹಯಾತ್ರಿಯಾಗಿ ಹತ್ತಿರದಿಂದ ಕಂಡ ನಿಮ್ಮಂತಹವರಿಗೆ ಇದು ಕೇವಲ ಒಂದು ಕಾರ್ಯಕ್ರಮವಲ್ಲ; ಒಂದು ದೊಡ್ಡ ಕುಟುಂಬವಾಗಿ ಸೇರಿ ಅವರನ್ನು ನೆನಪಿಸಿಕೊಳ್ಳುವ, ಅವರೊಂದಿಗಿನ ಒಡನಾಟದ ನೆನಪುಗಳನ್ನು ಹಂಚಿಕೊಳ್ಳುವ ಮತ್ತು ಅವರು ನಂಬಿ ಬದುಕಿದ ಆದರ್ಶಗಳನ್ನು ಮತ್ತೊಮ್ಮೆ ಮೆಲುಕು ಹಾಕುವ ಸಂದರ್ಭ.

ಆಲೋಚನೆಗಳನ್ನು ಕಾರ್ಯರೂಪಕ್ಕೆ ತಂದು, ಅವುಗಳನ್ನು ಜನರ ಬದುಕಿಗೆ ಉಪಯೋಗವಾಗುವ ಯೋಜನೆಗಳಾಗಿ ಮತ್ತು ಸಂಸ್ಥೆಗಳಾಗಿ ಬೆಳೆಸುವುದು ಅನಂತಕುಮಾರ್ ಅವರ ವಿಶೇಷತೆ. ಶ್ರೀ ಅಟಲ್ ಬಿಹಾರಿ ವಾಜಪೇಯಿ ಜೀ ಮತ್ತು ಶ್ರೀ ನರೇಂದ್ರ ಮೋದಿ ಜೀ ಅವರ ಸರ್ಕಾರಗಳಲ್ಲಿ ಕೇಂದ್ರ ಸಚಿವರಾಗಿ ಜನೌಷಧಿ ಕೇಂದ್ರಗಳು, ಬೆಂಗಳೂರು ಮೆಟ್ರೋ, ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ, ಶೇ.100ರಷ್ಟು ಬೇವಿನ ಲೇಪಿತ ಯೂರಿಯಾ ಸೇರಿದಂತೆ ಅನೇಕ ಮಹತ್ವದ ಯೋಜನೆಗಳಲ್ಲಿ ಅವರು ತಮ್ಮದೇ ಆದ ಛಾಪು ಮೂಡಿಸಿದರು.

ಅವರ ಇನ್ನೊಂದು ವಿಶೇಷ ಗುಣ ಜನರನ್ನು ಗುರುತಿಸಿ ಬೆಳೆಸುವುದು. ಯುವಕರಿರಲಿ, ಹಿರಿಯರಿರಲಿ—ಅವರಲ್ಲಿರುವ ಸಾಮರ್ಥ್ಯವನ್ನು ಗುರುತಿಸಿ, ಪ್ರೋತ್ಸಾಹಿಸಿ, ಸಾರ್ವಜನಿಕ ಹಾಗೂ ಸಾಮಾಜಿಕ ಜೀವನದಲ್ಲಿ ಮುಂದೆ ಬರುವಂತೆ ಮಾಡಿದವರು ಅನಂತಕುಮಾರ್.

ಈ ವರ್ಷ ವಂದೇ ಮಾತರಂಗೆ 150 ವರ್ಷಗಳು ತುಂಬುತ್ತಿರುವ ವಿಶೇಷ ಸಂದರ್ಭವೂ ಹೌದು. ವಂದೇ ಮಾತರಂನೊಂದಿಗೆ ಅನಂತಕುಮಾರ್ ಅವರಿಗೆ ಭಾವನಾತ್ಮಕ ನಂಟಿತ್ತು. ಕೇಂದ್ರ ಯುವಜನ ವ್ಯವಹಾರ ಮತ್ತು ಕ್ರೀಡಾ ಸಚಿವರಾಗಿದ್ದಾಗ, ಹೊಸ ಸಹಸ್ರಮಾನವನ್ನು ಸ್ವಾಗತಿಸುವ ಸಂದರ್ಭದಲ್ಲಿ ದೆಹಲಿಯ ಇಂಡಿಯಾ ಗೇಟ್ ಬಳಿ ಯುವಜನರು ಒಟ್ಟಾಗಿ ವಂದೇ ಮಾತರಂ ಹಾಡುವ ಕಾರ್ಯಕ್ರಮಕ್ಕೆ ಅವರು ಚಾಲನೆ ನೀಡಿದ್ದರು. ನಂತರ ಅವರ ನೇತೃತ್ವದಲ್ಲಿ ಬೆಂಗಳೂರಿನ ನ್ಯಾಷನಲ್ ಹೈಸ್ಕೂಲ್ ಮೈದಾನದಲ್ಲಿ ಪ್ರತಿವರ್ಷ ಸಾವಿರಾರು ಯುವಕರು, ಹಿರಿಯರು ಒಂದೇ ಧ್ವನಿಯಲ್ಲಿ ವಂದೇ ಮಾತರಂ ಹಾಡುತ್ತಿದ್ದರು. ದೇಶಭಕ್ತಿ ಮತ್ತು ಸಾಮೂಹಿಕ ಚೈತನ್ಯವನ್ನು ಜಾಗೃತಗೊಳಿಸಿದ ಆ ಕ್ಷಣಗಳು ಇಂದಿಗೂ ಅವಿಸ್ಮರಣೀಯ.

ಸೆಪ್ಟೆಂಬರ್ 22ರಂದು ಬೆಳಿಗ್ಗೆ 11ರಿಂದ ಸಂಜೆ 7ರವರೆಗೆ ದಿನಪೂರ್ತಿ ಕಾರ್ಯಕ್ರಮವನ್ನು ಆಯೋಜಿಸಿದ್ದೇವೆ. ದೀರ್ಘ ಭಾಷಣಗಳು ಮತ್ತು ಔಪಚಾರಿಕ ವೇದಿಕೆ ಕಾರ್ಯಕ್ರಮಗಳಿಗೆ ಹೆಚ್ಚಿನ ಒತ್ತು ನೀಡದೆ, ಅನಂತಕುಮಾರ್ ಅವರ ಸ್ನೇಹಿತರು, ಸಹೋದ್ಯೋಗಿಗಳು, ಬಂಧುಗಳು, ಅಭಿಮಾನಿಗಳು ಮತ್ತು ಕಾರ್ಯಕರ್ತರು ಮುಕ್ತವಾಗಿ ಭೇಟಿಯಾಗಿ, ಮಾತನಾಡಿ, ನೆನಪುಗಳನ್ನು ಹಂಚಿಕೊಂಡು, ಅವರಿಗೆ ಪ್ರಿಯವಾಗಿದ್ದ ವಿಚಾರಗಳು ಮತ್ತು ಮೌಲ್ಯಗಳನ್ನು ಸಂಭ್ರಮಿಸುವ ಆತ್ಮೀಯ ಕೂಟವಾಗಿರಬೇಕು ಎಂಬುದು ನಮ್ಮ ಆಶಯ. ಅನಂತಕುಮಾರ ರ ಪ್ರೀತಿಯ ಬಿಸಿಬೇಳೆ ಭಾತ್, ಗಿರ್ಮಿಟ್, ಮಿರ್ಚಿ ಬೋಂಡಾ ಕಾರ್ಯಕ್ರಮದ ಮೆರಗು ಹೆಚ್ಚಿಸಲಿವೆ.

ಈ ಸಂದರ್ಭದಲ್ಲಿ ಎರಡು ವಿಶೇಷ ಪ್ರದರ್ಶನಗಳನ್ನು ಆಯೋಜಿಸಿದ್ದೇವೆ.

‘ಭಾರತೀಯ ಆಡಳಿತಗಾರರ ಜೀವನ ಮತ್ತು ನಾಯಕತ್ವ’ ಪ್ರದರ್ಶನದಲ್ಲಿ ನಮ್ಮ ಪುಣ್ಯಭೂಮಿಯ ಇತಿಹಾಸದಲ್ಲಿ ಅಚ್ಚಳಿಯದ ಹೆಜ್ಜೆಗುರುತು ಮೂಡಿಸಿದ ಸುಮಾರು 30 ಪ್ರಮುಖ ರಾಜ-ರಾಣಿಯರ ಜೀವನ, ನಾಯಕತ್ವ ಮತ್ತು ಕೊಡುಗೆಗಳನ್ನು ಪರಿಚಯಿಸಲಾಗುವುದು.

‘ಹಸಿರು ಜೀವನಶೈಲಿ – ಸಸ್ಯಾಗ್ರಹ’ ಪ್ರದರ್ಶನದಲ್ಲಿ ಶೂನ್ಯ ತ್ಯಾಜ್ಯದ ಅಡುಗೆಮನೆ, ತಾರಸಿ ತೋಟದಿಂದ ಹಿಡಿದು ನಮ್ಮ ದಿನನಿತ್ಯದ ಬದುಕಿನಲ್ಲಿ ಮಾಡಬಹುದಾದ ಸರಳ ಬದಲಾವಣೆಗಳವರೆಗೆ—ಪರಿಸರಸ್ನೇಹಿ ಬದುಕಿನತ್ತ ಸಾಗುವ ಪ್ರಾಯೋಗಿಕ ಮಾರ್ಗಗಳನ್ನು ಪರಿಚಯಿಸಲಾಗುವುದು. ಹವಾಮಾನ ಬದಲಾವಣೆಯ ಪರಿಣಾಮವನ್ನು ತಗ್ಗಿಸಿ, ನೆಟ್ ಝೀರೋ ಕಾರ್ಬನ್ ಉತ್ಸರ್ಜನೆಯ ಗುರಿಯತ್ತ ನಮ್ಮ ಬದುಕನ್ನು ಹೇಗೆ ಕೊಂಡೊಯ್ಯಬಹುದು ಎಂಬುದನ್ನೂ ಇಲ್ಲಿ ಕಾಣಬಹುದು.

ದಿನವಿಡೀ ಲಘು ಸಂಗೀತ, ವಿವಿಧ ಕ್ಷೇತ್ರಗಳ ಸಾಧಕರಿಗೆ ಸನ್ಮಾನ, ನಮ್ಮ ದಾನಿಗಳು ಮತ್ತು ಹಿತೈಷಿಗಳಿಗೆ ಗೌರವ ಸಮರ್ಪಣೆ, ಅದಮ್ಯ ಚೇತನ ಮಧ್ಯಾಹ್ನದ ಬಿಸಿಯೂಟ ನೀಡುತ್ತಿರುವ ಶಾಲೆಗಳ ಎಸ್‌ಎಸ್‌ಎಲ್‌ಸಿ ಅಗ್ರ ಸಾಧಕರಿಗೆ ಅಭಿನಂದನೆ ಸೇರಿದಂತೆ ಹಲವು ಕಾರ್ಯಕ್ರಮಗಳು ನಡೆಯಲಿವೆ.

ಈ ಆತ್ಮೀಯ ಸಂದರ್ಭದಲ್ಲಿ ತಾವು ನಮ್ಮೊಂದಿಗೆ ಇರಬೇಕೆಂಬುದು ನಮ್ಮ ವಿಶೇಷ ಅಪೇಕ್ಷೆ. ದಿನದ ಅವಧಿಯಲ್ಲಿ ತಮಗೆ ಅನುಕೂಲವಾದ ಯಾವುದೇ ಸಮಯದಲ್ಲಿ ಬಂದು, ಅನಂತಕುಮಾರ್ ಅವರ ಕುಟುಂಬದೊಂದಿಗೆ ಸ್ವಲ್ಪ ಸಮಯ ಕಳೆಯಿರಿ. ಅವರೊಂದಿಗಿನ ನಿಮ್ಮ ನೆನಪುಗಳನ್ನು ಹಂಚಿಕೊಳ್ಳಿ.

ತಮ್ಮ ಉಪಸ್ಥಿತಿಯೇ ಈ ಕಾರ್ಯಕ್ರಮಕ್ಕೆ ವಿಶೇಷ ಅರ್ಥ ಮತ್ತು ಆತ್ಮೀಯತೆಯನ್ನು ನೀಡುತ್ತದೆ.